Rabu, 14 Maret 2012

Sang Ekalawya

SANG ÉKALAWYA
            Sang Ékalawya kedeh pisan pakayunané pacang mapaguruan aji pepanahan ring Dang Hyang Drona. Dang Hyang Drona nulak pinunas Sang Ékalawya santukan sampun makéh madrué sisia : Panca Pandawa, Satus Korawa, muah watek Wresni. Nanging Sang Ékalawya tan surud pakayunannyané mapaguruan. Dané melajah saking doh, saking alasé, malarapan antuk arcan Dang Hyang Drona. Sang Ékalawya ngrahina ngacep Dang Hyang Drona, tur jemet nglatih raga mapanahan ngantos prajnyan.
             Kala punika Sang Arjuna maboros saha makta asu borosan. Asu punika gasa pisan masusupan tur ngongkong macakal. Sang Ékalawya mireng asu macakal, raris agé dané ngujanin kongkongan asu punika antuk panah. Sami ngenenin bungut asu punika.
            Sang Arjuna ngetut asu punika, kapanggih sampun padem. Sada doh saking genah punika wénten anak lanang makta langkap. Sang Arjuna raris nampekin anak lanang punika.
Sang Arjuna                : Jero anak lanang, sapasira jeroné, clapat-clapat iriki ?
  Tiang Arjuna, satria pandawa !
Sang Ékalawya           : Nawegang Ratu Sang Arjuna, titiang nunas lugra !
  Titiang mawasta Sang Ékalawya, wangsa Nisada
Sang Arjuna                : O, Ékalawya ! Jeroné sane ngamademang asu borosan tiangé ?
Sang Ékalawya           : Ampura titiang Ratu Sang Arjuna. Wiakti titiang sané manah
                                     kongkongan asu, santukan wénten piragi itiang asu ngongkong
                                     macakal.
Sang Arjuna                : O, keto ?! Sira pinaka gurun jerone indik aji pepanahan ? titiang
                                     meled uning.
Sang Ékalawya           : Ampura Ratu Sang Arjuna ! Wantah Ida Dang Hyang Drona. Saking
iriki titiang ngacep Ida Dang Guru, malarapan antuk arca, sané pinakayang titiang raganida.

 Sang Arjuna               : Inggih, matur suksma Sang Ekalawya ! (raris Sang Arjuna makaon,
                                     Swabawané érang, mawali ka puri. Tan asué malih ida rauh,
                                     Kasarengin antuk Dang Hyang Drona).
Sang Ékalawya           : Nunas lugra titiang, Dang Guru ! Titiang ngaturan sembah subakti
                                     Ring jeng paduka Dang Guru, santukan  I Ratu lédang ngrauhin titiang
                                     Iriki ring tengah alase.
Sang Arjuna                : Singgih, Dang guru ! Linyok Dang Guru ring titiang . Dang guru
                                     Ngandikayang titiang sisia sane pinih dueg ring aji pepanahan. Puniki
                                     wénten sisian Dang Guru, mawasta Sang Ekalawya. Ipun doh duegan
                                     ring titiang. Ipun dueg manah suara, tan wénten  lémpas angan asiki.
                                     Cingak asu puniki !.
Dang Hyang Drona     : Cening Sang Ekalawya ! Bagia Bapa ngelah sisia kalintang dueg
                                     Buka Déwa. Mapan sube subal paguruané, patut sang sisia ngaturan
                                     Daksina ring guru.
Sang Ékalawya           : Singgih Ratu Dang Guru, sesuunan titiang ! Ampura banget, titiang
                                     matur sisip, titiang nunas geng sinampura. Punapi sané patut aturan
                                    titiang, sasida-sidan antuk titiang, jagi aturang titiang.
Dang Hyang Drona     : Uduh cening Sang Ékalawya, sayang ! Tuah abedik ané idih Bapa,
                                     ento inan lima tengawan Ceningé alap Bapa pinaka daksina.
Sang Ékalawya           :Inggih Ratu Dang Acarya, sesuunan titiang ! Titiang matur suksma
                                     Pisan ring jeng paduka, Dang Acarya. Kalintang nista aturang titiangé.
                                     Puniki durusang !
                                    ( Sang Ékalawya nyubah raris ngenjuhang inan lima jriiné).

Tidak ada komentar:

Posting Komentar